Waray-Waray News: "Peace Education" subject na ha mga pampubliko nga eskoylahan
By Alice Nicart
Manila (25 July) -- Ig-uupod na ha curriculum hit mga pampubliko nga eskoylahan an subject nga "Peace Education" ug "Teacher Education".
Amo ine an report han Department of Education(DepEd). Ine nga disisyon han DepEd in nahimugso daw tikang han pakipagharampang han buhatan ha iba-iba nga ahensiya dida han ira pagpirirmahay han mga aludaydayan o implementing rules and regulation (IRR) para han Executive Order 570, nga nagmamandu han pag-updan na han hine nga "Peace Education" ug "Teacher Education" ha pampubliko nga pangiskoylahan.
Sumala pa han report, nagsering pa daw hi Secretary Jeslie Lapuz nga kaangayan la nga ig-upod an DepEd dida han mga ahensiya nga may kalabutan han pag establisar han kamurayawan han nasud tungod kay dako an implowensya han edukasyon dida han paghahatag hin edukasyon bisan pa ha tinguha nga magkaada kabalhinan an pamahung-pahung hin usa ka tawo, pinaagi han pormal nga pag-aradman.
Ginhurma an IRR han Technical Working Group (TWG) nga ginkokomponer han Office of the Presidential Adviser on the Peace Process (OPAPP), DepEd, Commission on Higher Education (CHED), national Economic Development Authority (NEDA) ug mga representates han civilian nga grupo. (PIA_Eastern Samar) [top]
