By Lanie Pitao-Tupaz

Manila (9 January) -- Ang pagduso ni Presidente Gloria Arroyo sa paggamit sa solar power gipasidunggan tungod sa kalaposan sa Sinag solar-powered nga sakyanan nga mao ang unang entry sa Pilipinas ngadto sa World Solar Challenge nga gipahigayon sa Australia niadtong miaging Oktobre.

Si kanhi Energy Secretary Vince Perez nga karon mao na ang chairman sa Philippine Solar Car Challenge Society Inc. mapasalamaton ni Presidente sa iyang suporta sa pagpauswag sa mga kakuhaan ug enerhiya dinhi lamang sa atong nasud ug dili na magsalig pa sa mga imported nga lana.

Agi ug pasalamat si Perez mihatag ni Presidente ug usa ka replica sa solar car nga gibuhat sa De La Salle College of Engineering.

Si Presidente nga nalipay sa kalamposan sa Sinag Team, mipasidungog kanila ug mipadayag sa paglaom nga mosalmot gihapon sila sa tuig 2009 tungod kay matag duha man ka tuig ipahigayon ang World Solar Challenge uban ang bag-o na usab nga solar-powered car diin mipasalig usab si Rene Fernandez, ang Sinag Team technical head.

Si Presidente Arroyo mapasalamaton usab sa suporta nga gipaabot sa Sun Power, US based solar cell manufacturer kinsa namuhunan ug $600 milyon sa Laguna Techno Park.

Ang solar panel nga gigamit sa Sinag solar-powered car ginama sa Sun Power. Ang lawas sa sakyanan hinimo sa carbon fibers.

Ang disenyo ug paghimo sa sakyanan gipahigayon sa grupo sa mga magtutudlo ug estudyante gikan sa Mechanical Engineering Department ug Communicatins Engineering Department sa De La Salle University-Manila tinabangan sa Ford Group Philippines, San Miguel Corporation, Motolite, Shell, Sun Power, Philippine Airlines, ug Ventus.

Samtang sa laing bahin, ang grupo ni Perez mao ang tig-implementar sa mga programa sa gobyerno alang sa padayon nga paggamit sa mga renewable energy pinaagi sa mga sakyanan.

Ang Sinag solar car nakakuha sa ika 20 nga puwesto sa 38 ka mga partisipante sa World Solar Challenge nga gipangunahan sa Nuon Solar Team sa Netherlands..

Ang solar car sa Pilipinas nga gihinganlan ug Sinag nakatapos ug 3,021 ka kilometro nga lumba gikan sa Darwin kutob sa Adelaide sa Australia.

Bisan pa man sa pagkabagito sa Philippine team, ang ilang sakyanan wala motirik sa inatibuk-an sa biyahe latas sa Australia diin pipila ka mga entries ang gipangkarga sa trailer pagkatapos makaeksperyensiya ug aberya.