Calapan City (24 March) -- Hinihikayat ang mga lokal na pamahalaan ng magsagawa ng kani-kanilang mobile blood donation activities dahil awtomatikong hindi na kinakailangan pang palitan ng mga pasyente ang mga dugong naisasalin sa kanila kung nagsasagawa ng blood letting activities ang kani-kanilang pamahalaang bayan.

Ito ang binigyang-diin ni Bise-Gobernador Maria Estela Felipa M. Aceron, chairman ng Oriental Mindoro Provincial Blood Council (OMPBC), sa katatapos na pagpupulong ng konseho sa Kapitolyo kamakailan.

Sa kasalukuyan, tinatayang nasa 250 bags ng dugo ang nagagamit sa Oriental Mindoro Provincial Hospital pa lamang buwan-buwan. Dalawang bags ng dugo ang kapalit ng bawat bag na naisasalin sa pasyente o pagbabayad ng pasyente ng P1,500 na screening fee ng dugo.

Ipinanukala naman ni Bokal Romeo Infantado, SP Committee chair on health, at isa sa mga myembro ng konseho, ang pag-aaral sa kung paanong maaaring mapondohan ng OMPBC ang screening fee na ibinabayad ng mga pasyente na hindi kayang palitan ang mga dugo na naisasalin sa kanila.

Kaugnay nito, 72 mamamayan ang naging blood donors sa magkakasunod na MBDs na isinagawa ng OMPBC sa PNP Suqui, Calapan noong ika-16 ng Marso kung saan 11 katao ang naging blood donors, sa DWCC noong ika-17 ng Marso na may 38 blood donors at sa bayan ng Baco noong ika-18 ng Marso na may 23 blood donors.